جبت عمري لطم ودموع واحزان
اضن متنسيه امي بيوم عاشر
بركن تابوتي واكف باقي اتانيك!!
تجيني شوكت عطلت اليدفنون
اجت دعوه عرسها بهذا الاسبوع
حضرت الجفن حته ادفع الهربه
لان اخضر ضميري وكلبي بستان
عله ضلوعي تحط شكد عصافير!!
يلوموني شعجب ماتغفه العيون؟
وانا مضيف الجمر بعيوني خطار
قصيده اكتبله كلمن يدخل الروح!!
ها شتكول ابلش بالقصيده؟؟
شفت باجر مثل امس ماكو اختلاف!؟
أمنيتي اعيش ايام مامستعملات؟!!
بعد وجه الكلب مايحمل جروح
تعب من الجروح يريد تجميل
ما يمشي الوكت من تمشي وتروح؟!!
بس يركض ركض من تكعد وياي
انا بعازه اخو بالشده عون يصير
ماريده من اموت يصيرلي معزب
دخيلك يا دمع شد حيلك وياي
اريدن دمع يرفع راس العيون
استنكيلي الشماته باجر اتعناك
اريدن من امر كون انكلب نكته
اشرف شامت بهجرك علي فات
بنات الليل ماضحكن ضحكته
ماصيرن حبل للراد بيه زماط
تخلص شدته يسويني مرجوحه
عمري جادر فاتحه ونوح امهات
من تجيني الفاتحه اكلبهه عرس
صرت مثل السحاب معلك بزنجيل
لو اصعد فخر لو انزل مدنك
دخلت بمعركه حب انا وياك
طلع جيشي يحبك واخسرتهه
اطش احلام عمري لطولك الجاي
بعد صارت قديمه نجيب جكليت
صبح جرحي بغيابك يرضع هموم
صار بطولي مايقبك افطمه
انا جروحي يتامه بكلبي يتعشون
شلون اطرد يتيم وهوه يتعشه
لجروحي أشتريت اليوم لعابات
كالن عيب مو صرنه شكبرنه
ابجي عيوني لجلك لو نويت تروح
ما ابجي دمع صارت قديمه
قديمه الملح ماغزر يكولون
الهوه شتميته عدكم غزر وياي
صبح نافوره جرحي بيوم فركاك
واجت شماتي كصو يمه صوره
ضلمه وخيط اسود وابره عد عميان
الجرح بجفاك صدك هيج يتخيط
يتامه افكار راسي وشردن من النار
اجيب منين زينب خاطر تلمهن
جنود دموع عيني وبالجفن قناص
من تسمع بهجرك كلهه تستشهد
الله وياك يوسف رايد تصير
كلب يعقوب عندي وراح اتانيك
نفط ودموع الك رشيت الهدوم
الحكني وتعال بعود شخاط
من رفع سيفه ابن ملجم عالامام
سوه حفله ابليس شد وزره وركص
ذبحوهه السنه وراس السنه كطعوه
وبقت مريم تتاني وتطلك بعيسى
من كد مامشيت وراسي مرفوع
وصلت لمرحله اشتاكيت للكاع
انا بيه طبع يشبه طبع تنور
عمر يحرك بروحه وما اكل كرصه
حزمت روحي بغرامك ردت اصول
ومن وصلت الساتر..الحرب انتهت
كبل جانت الدمعه بعيني بت بيت
هسه عليك ظلت لازمه الباب
مامختار اهلي بس احبهم حيل
دقيس شكد احبك وانه مختارك
يوميه صديق بداخلي يموت
خلصت العمر انصب جوادر
من كدما اصيح وانت ماجاي
طلع صوتي يدور بالدرابين
من يوم الرحت ضل صافن البيت
صفنه شايب تذكر شبابه
انه حتاجيت جيتك حاجت الصوت
للخرسان خايب من يغركون
بجمالك خبلت كل اليخبلون
وتحول كل مخبل صار صاحي
صرت مثل الدعاء انذكر وكت العوز
وبوكت النفاهه بسرعه تهملني
